Швейцарская кухня

Швейцарская кухня — нацыянальная кухня Швейцарыі. Яна зазнала шмат рэгіянальных уплываў сярод іншага з боку французскай, нямецкай ды італьянскай кухні. У ёй таксама ёсць мноства страў, характэрных толькі для швейцарскай кухні. Гістарычна Швейцарыя была краінай фермераў, таму традыцыйныя швейцарскія стравы збольшага простыя, гатуюцца з самых распаўсюджаных інгрыдыентаў, такіх як бульба і сыр.

У Швейцарыі існуе многа рэгіянальных страў. Адным з прыкладаў з'яўляецца гешнэцэльтэс па-цюрыхску. Яно складаецца з нарэзнай цяляціны з грыбамі у сметанковым соусе, падаецца з рошці. У сённяшняй Швейцарыі карыстаецца попытам італьянская кухня - асабліва паста і піца. Ежа, якая звычайна асацыюецца з Швейцарыяй, уключае сыр і малочны шакалад. Швейцарскія сыры, асабліва Эменталь, Груер, Вашрын, Апенцэлер - вядомыя швейцарскія прадукты. Найбольш вядомымі сырнымі стравамі з'яўляюцца фандзю і раклет. Яны абедзве першапачаткова былі рэгіянальнымі стравамі, але Швейцарскі Сырны Саюз папулярызаваў іх, каб павялічыць продаж сыру.

Рошці - папулярная страва з бульбы, якая спажываецца ва ўсёй Швейцарыі. Першапачаткова гэта была страва на сняданак, але яе замянілі мюслі, якія звычайна ядуць на сняданак і ў Швейцарыі завуцца "Birchermüesli" (у некаторых рэгіёнах "Birchermiesli"). Таксама на сняданак і на абед многія швейцарцы любяць тоставы хлеб з маслам і варэннем. У Швейцарыі прадаюцца шмат відаў саек. Хлеб з сырам - папулярная страва на абед.

Да традыцыйных швейцарскіх страў таксама адносяць тарты і кіш. У прыватнасці, тарты гатуюць з усялякімі ўпрыгажэннямі - ад салодкіх яблыкаў да цыбулі.

У італьянамоўнай частцы Швейцарыі (вобласць Тычына), можна знайсці рэстараны, якія сустракаюцца толькі ў гэтым рэгіёне. Рэстаран "Grotto" прапануе вясковую ежу, традыцыйныя стравы ад пасты да хатніх мясных рэцэптаў. Папулярнымі стравамі з'яўляюцца луганіге і луганігета - сорт свойскіх сасісак.